حرية شخصية

حــــريـة شـــخـصيـة

أنا معرفش يعنى أيه حرية شخصية هيه بالنسبة لى مجرد كلمة كنت بقولها وأنا صغيرة لما حد يضايقنى ويقول لى اللى أنتى بتعمليه ده غلط وطبعا تتطلع الأجابة المنطقية الفظيعة تقول أنا حرة أو دى حرية شخصية، لما كبرت سمعت عبارة عجبتنى أوى وهيه أن حريتى تنتهى عندما تبدأ حرية الأخرين حلو جدايعنى مثلا أنا من حقى أرسم فى بيتنا زى ما أنا عاوزة بس لو نزلت الشارع وأبتديت أرسم على الجدران كدا أبقى دخلت فى منطقة حرية الأخرين لأنه ببساطة الشارع ده بتاعهم بردو ومن حقهم يقولوا رأيهم فى أنى أرسم أو لأ، بس بردو أنا لسه معرفش يعنى أيه حرية شخصية ومؤخرا حسيت أنها بجد جملة ملهاش أى معنى وخصوصا أذا كنت بتتكلم مع حد فى أمر من أمور الدين وتلاقيه يتحفك بعبارة دى حرية شخصية بمعنى أيه حضرتك دى حرية شخصية، بمعنى أنك مررت الموضوع على عقلك ولاقيت أن دينك بيتدخل فى حريتك الشخصية وأن ربنا بيتدخل فى حياتك بطريقة هوه مش المفروض يتدخل بيها فقررت انك مش حتعمل الأمر ده لأنه ببساطة لا يتناسب مع حريات حضرتك ولا الحرية الشخصية دى أن حضرتك كبير كفاية أنك تعرف إن الحاجة دى غلط وحرام ومن باب أنك حر أخترت أنك متعملهاش وأنك بتتحمل كل المسئولية وكل العواقب اللى حتترتب على مخالفة أمر دينى ، وببساطة لو أنت فعلا كبير كفاية وبتفهم أوى كدا كنت عرفت أن مصلحتك أنك تتبع أوامر اللى خلقك لأنه ببساطة بيعرف أكتر منك ...
مبدئيا عشان نحط أساس سليم لحياتنا كدا لازم نعترف أن أنا مش حر أنا عبد والحاجة اللى بختارها فى حياتى هيه ياأما أنا حبقى عبد لربنا ولا حبقى عبد لشهواتى وأهوائى وأى حاجة تانية ، بس فى كل الأحوال أحنا حنختار نبقى عباد ولا عبيد ... عباد دى جمع عبد وده جمع لعباد ربنا زى ما ربنا ذكر فى القرآن "عباد الرحمن" أما عبيد دى ففيها نوع من الأهانة شوية للناس اللى بتعبد أى حاجة تانية..
أيه اللى مضايقنى أوى فى حرية شخصية وعبيد .... فكرة أن بقى فيه مسلمين كتير بمجرد ما يسافروا بره أو حتى هنا يقرروا أنهم مش حيصلوا أو مش حيدفعوا زكاة أو مش حتلبس حجاب ويشوفوا أن دى حرية شخصية ولما حد يسألهم مش مسلم عن اسباب اللى همه بيعملوا يجاوبوا بالأجابة الواهيه الحرية الشخصية أو حتى من غير ما حد يسأله ويشوفه بس وهوه بيعمل كدا ..وهوه مش فاهم أنه بكدا بيوصل رسالة أنه الأسلام بيتدخل فى حريتى وأنا بعقليتى الفظيعة اللى بتوزن الأمور قررت أنى معملش كدا عشان أنا شايف إن الحاجة دى ملهاش لازمة إنى أعملها ..
ومن ناحية أخرى نتضايق أوى لما حد يقول على الأسلام ده دين حرب أو أرهاب ويبتدى الدفاع يخرج من أفواه ناس كانت لسه أمبارح بتشكك فى مصداقية الأسلام سواء بكلام أو بأفعال وطبعا بما أنهم خلاص أعطوا الأنطباع بنقص الأسلام لدرجة أن أتباعه مش بيتبعوه فى الحقيقة وحاسين أنه ناقص ومش بيناسب مع أحتيجاتهم مطلوب من الناس أنهم فجأة يصدقوا أن الدين ده أتحول فى يوم وليلة لدين كامل عشان حد قال عليه حاجة ..
أنا مش بقول أننا مينفعش نغلط وان المسلم بجد عمره ما بيغلط بس خير الخطآئين التوآبين وع الأقل لما أعمل حاجة غلط تكون عندى شجاعة أنى أعترف أنى دى حاجة غلط وربنا يهدينى .