مجتمع الشخصيات الجذابة
مؤخرا دار بينى وبين شخص ما حوار عن الشخصية الجذابة وأكتشفت أن معظم الناس بتربط بين الشخصية الجذابة والناس اللى بتظهر فى التلفزيون (: ، وده خلانى أرجع لكتاب كنت درسته فى الكلية فيه مفهوم الشخصية الجذابة وبصراحة أنا نفسى أتفاجأت لأنى مع الوقت كنت نسيت اللى درسته (: .
مش عارفة أيه اللى خلانى أفكر فى الرسول صلى الله عليه وسلم والصحابة بعد ما قريت التعريف ، أقول التعريف وبعدين ندخل فى الموضوع .
تتميز الشخصية الجذابة بثلاث صفات أساسية هى:
التقبل : بمعنى تقبل الناس زى ماهى وعدم محاولة تغيرهم لشخص ما تريده أن يكون عليه .
القبول : بمعنى البحث عن شىء يعجبك فى الشخص الآخر وأبداء رأيك بأن هذا السلوك يعجبك والثناء عليه وتلقائيا سوف تبدأ الصفات التى تعجبك فى الشخص الآخر بالتزايد ومن ناحية أخرى سيبدأ الشخص الآخر بمحاولة لتغيير سلوكه ليحظى برضاءك .
التقدير : معنى أنك تقدر شخص أنك ترفع من قيمته ، وأيضا توجيه الشكر والتعامل معه بطريقة متميزة .
متهيألى الموضوع بقى واضح شوية كل اللى فكرت فيه أن الرسول صلى الله عليه وسلم كان بيتسم بالصفات الثلاثة وكان بيعامل صحابته بيهم ودى حاجة من حاجات كتير طبعا خلتهم يحبوه .
فكرة أنك تتقبل الآخر وتحترم شخصيته زى ماهوه ، أننا منحاولش نغير الناس كلهم على مزاجنا عشان يعجبونا الرسول صلى الله عليه وسلم كان أقرب أتنين ليه شخصيات مختلفة تماما عنه سيدنا عمر وسيدنا أبو بكر وعمره ما قالهم يا تبقوا زى ياأما مش حتبقوا من الصحابة ولا عمره عمل كدا مع حد صلى الله عليه وسلم كان دايما لما يعوز يغير سلوك فى حد يثنى على سلوك كويس عنده وبعد كدا يوجهه بالراحة .
كان فى مرة صحابى دخل المسجد والناس بتصلى وعمل دوشة بعد إنتهاء الصلاة الرسول صلى الله عليه وسلم راح له وقاله زادك الله حرصا ولا تعد ، متهيألى لو فى حد عمل كدا فى مسجد اليومين دول أحتمال إمام المسجد يعلقه على باب الجامع (: .
السمات بتاعت الشخصيات الجذابة دى دلوقتى بتدرس على أنها أتيكيت وحاجات ناس من بره همه اللى حاطوها بعد عناء ودراسة وهيه أصلا حاجات قدامنا من 1400 سنة ومحدش حاول يحطها فى كتاب ويعلمها للناس بقينا بنجرى ورا الحاجات اللى بره بيحطوها عشان نعرف نوصل لدماغهم وأذا أتمسكنا بالدين وأخلاق نبينا كانوا همه اللى حيبقوا بيتعلموا منا .
تخيل إن الرسول صلى الله عليه وسلم كان بيفهم فى الأتيكيت وبيعامل الناس بمنتهى اللباقة ، كل ما أسمع حاجة وأقول دى جديدة سبحان الله بعد فترة ألاقيها فى دينى طبعا بحس أنى شكلى وحش جدا أن الحاجات دى كانت قدامى طول الوقت ولسه سمعاها قريب وكمان من حد أجنبى حاجة تكسف يعنى متهيألى ده بقى حالنا كلنا بقينا بندور على كل حاجة بره مع أنها قدامنا ربنا نزل لنا الكاتلوج بتاعنا من 1400سنة أحنا اللى مصممين نعمل كاتلوج مختلف وعادة ما بتبوأ التجربة بالفشل .
تخيلت كدا حال الصحابة مع بعض ومع الرسول صلى الله عليه وسلم بعد ما أتعلموا منه وحسيت أنه ده فعلا مجتمع الشخصيات الجذابة ولو أحنا بجد طبقنا اللى فى ديننا مش حنبقى محتاجين حد يقول لنا نعمل أيه ومنعملش أيه حنبقا عارفين عشان رسول الله علمنا أحسن تعليم عشان هوه نفسه علمه الحكيم العليم .
