البـــــــركـــة
كنت على طول بسمع الناس بتتكلم عن بركة ربنا فى الرزق بس عمرى ما أستوعبتها بجد وبعدين مرة سمعت درس للشيخ محمد حسان بيتكلم عن البركة وأكيد كنت مقتنعة بكل حاجة قالها وأنه أكيد ربنا بيبارك للواحد فى عمره ورزقه لما يتقى ربنا بس بصراحة عمرى ما كنت جربتها قبل كدا أنه ربنا يباركلى فى حاجة أو يمكن عدت عليا حاجة ربنا باركلى فيه والشيطان نسانى بس المرة دى تقريبا عمرى ما حنساها ..
عشان أوضح الفكرة لازم أشرح بعض المعلومات عنى مبدئيا أنا حد كسول شوية .. مش بحب أمشى خالص وممكن لما أخرج مع صحباتى نكون رايحين من مكان لمكان تانى ممكن ياخد ربع ساعة لازم أركب تاكسى .. أنا فاكرة مرة فضلنا واقفين نص ساعة عشان نستنى تاكسى ياخدنا للمكان اللى بيبعد ربع ساعة مشى.. بنى آدمين أستحالة يعنى ماعلينا وعادة مش بشيل حاجة تقيلة وأفتكر مرة شيلت حاجات لماما قعدت بتاع أسبوع عضلات أيدى وجعانى .. وعندى حاجة كدا ساعات بتجيلى لما بقعد فترة مش باكل وتكون الدنيا حر وهيا ان ضغطى بينخفض فجأة........... أنا برغى كل الرغى ده ليه .. حدخل فى الموضوع ..
كان بقالى فترة بسمع عن القوافل بتاعت رمضان فى رسالة بس عمرى مارحت معاهم , رمضان اللى فات قررت إنى عاوزة أروح .. طبعا كنت رايحة وبتراودنى كافة المخاوف اللى ذكرتها سابقا .. خايفة أدوخ وانا صايمة خايفة أقعد تعبانة أسبوع ومعرفش أنزل أصلى المهم توكلت على الله ورحت الساعة 8 كنت هناك ومن أول ما رحنا ابتدى الشغل قعدنا نعبى فى أكياس الرز والفول والحاجات بتاعت شنطة رمضان لغاية ما جه معاد الباص ركبنا ورحنا قرية كدا فى الجيزة أسمها غريب المرة دى مكناش بنوزع شنط رمضان كانت شنط مدارس للاطفال بتوع القرى عشان نشجعهم يروحوا المدرسة ...
عشان اللى مرحش قرى قبل كدا ودى كانت أول مرة ليا شخصيا .. مافيش حاجة فى القرى أسمها طرق مسفلتة كلها طرق معرجة وضيقة وحتة طالعة وحتة نازلة كدا يعنى وطبعا التراب ده حاجة أساسية مع شوية طين بين الحين والاخر . من الاخر الطرق دى متعبة جدا فى المشى وأحنا وصلنا الساعة 10 صباحا مشينا الساعة 4وشوية المهم طبعا كان واضح أننا مش حنلحق نفطر فى البيت ومكنش حد عامل حسابه على حاجة وفطرت على ميه وتمرة فى الباص وأحنا راجعين ويادوبك وصلت بيتى على العشا طبعا يوم شاق جدا ومكنتش نمت قبليها بيوم لما روحت صليت المغرب والعشا وقلت أنا يادوبك أصحى قبل الفجر بساعة وظبط منبهى ..
وسبحان الله بعد اربع ساعات صحيت قلقانة ومش تعبانة خالص خالص أنا كنت متفاجأة مووووووووووووووت الحمد لله صليت التراويح بما انى مكنتش صليتها وبعدين عملت قيام ليل وفضلت صاحية للفجر وقعدت بعدها للضحى زى ما متعودة ولا كأنى عملت مجهود شاق قبليها بيوم ولا أى حاجة وقتها حمدت ربنا بس مكنتش أستقرت فى نفسى موضوع البركة ده اوى المهم بعديها بأسبوع قافلة تانى بس كانت يوم ليلة القدر ومكنتش شنط مدارس كانت شنط رمضان حاجة أتقل بمراحل الحمد لله توكلت على الله ورحت وتقريبا نفس السيناريو بس المرة دى وصلنا بدرى شوية والمغرب بيأذن والمرة دى حصلت حاجة أحسن نمت ساعتين وصحيت قبل برنامج عمرو خالد بشوية وأتفرجت على البرنامج وصليت زى ما بصلى كل يوم الحمد لله وجالى الهاتف (: وفتحت التلفزيون بالظبط فى صلاة التراويح والسديس بيدعى ودعيت معاه وبجد الليلة دى قعدت أفكر فى البركة اللى ربنا أدهالى فى صحتى ووقتى عشان كنت ناوية أعمل حاجة خير ... بجد الموضوع ده مافيش حد بقى مركز فيه يعنى أيه ربنا بجد يباركلك فى القليل ويبقى مكفيك وزيادة عشان بس بتتقى وجه الله ومقتنع أنه ربنا قادر أنه يباركلك .. لما توكلت عليه ووثقت فى قدرته باركلى.. مينفعش نجرب ربنا مينفعش نتعامل معاه وأحنا حاسين أنه ميقدرش يدينا وأذا أدانا حاجة قليلة أستغفر الله العظيم مش حيعرف يبارك لنا فيها أزاى يعنى ده ربنا ....
بعد كدا فكرت فى حالنا دلوقتى أول حاجة جت فى بالى سائقين التاكسى عشان دى الفئة اللى بتعامل معاها وفعلا مطلعين عينى وكل ماتتكلم مع حد فيهم يرد الرد الطبيعى الدنيا غليت ومش عارفة الطماطم بقت بكام والبنزين بكام وواحد شاب كدا أتحفنى بأنه عاوز يجوز ويجهز نفسه يعمل أيه يعنى - يسرقنا- ,, ماعلينا وأفتكرت قصة حكاها دكتور عمر عبد الكافى عن واحد راح يشتكى لحد من العلماء زمان أنه مراته وأولاده مطلعين عينه والعالم رد عليه رد غريب جدا قاله انت بتكسب كام قاله خمس دينار قاله روح لرب عملك قله يقلل مرتبك راح ورجع بعد فترة قاله محصلش حاجة مراتى وعيالى زى ماهمه قاله روح لرب عملك تانى وقله يقللك راح .. رجع بعد فترة قاله الحمد لله مراتى وعيالى ربنا هداهم وقاله مش فاهم هوه فى ايه رد العالم أنه كان بياخد رزق أكتر من حقه عشان كدا ربنا مكنش مباركله فى رزقه وكان مبتليه بتعب مراته وعياله .. لو قارنا القصة دى على واقعنا ... الموضوع واضح ..
الخلاصة كل اللى أحنا محتاجينة ثقة فى ربنا وأنه هوه ربنا وخلقنا وأستحالة حيسبنا ..
فى قول رائع للأمام الشافعى : "والله لو أن السماء من نحاس والأرض من رصاص
والخلق كلهم عيالي لما خشيت فقرا "
1 comment:
اللهم يا مؤنس كلّ غريب ويا صاحب كلّ وحيد وياملجأ كل خائف ويا كاشف كلّ كربة أسألك لأن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير.. ربنا يثبتك ويوفقك يا أروع أخت فى الدنيا .
Post a Comment